意外
翌日中午，在廣州琶洲展覽館內，王匡正推開展覽廳大門，直向大堂盡頭走去，邊走邊答來電。
「喂？」雖然已走出會議廳，王匡正還是把聲音壓低：「我係阿Jack……」
「喂，阿樂仔呀？」
「阿媽？」大堂中明亮的不鏽鋼柱身，反映出錯愕的表情。
王匡正走到玻璃幕牆前，看著展館外的廣場，眼光滿是迷惑，說：「媽？乜嘢事呀？喂……」
「阿樂仔！聽到嗎 ……？」聲音無疑是自己的母親，這使王匡正有點焦急。
「媽，我聽到。」王匡正把聲線提高：「我係阿樂呀，有乜事呀？喂？妳聽唔聽到呀？吓？」
電話沉默了約三秒，王匡正卻感到時間像已停頓。
突然之間，寬闊大堂人聲鼎沸，王匡正像給驚醒，他回過頭來，見人群從會議廳魚貫湧出，其中一人身穿筆挺白色警服，身後跟著一名女警。女警老遠便發現王匡正，並給那白衣警官示意，兩人便朝王匡正走來。
王匡正來不及作任何反應，耳伴再傳出聲音……
「唉，樂仔……」母親終打破沉默：「你阿爸叫我同你講，你要對阿玉好番啲 ……」
王匡正一手提著電話，一手按著另一耳朵，急說：「媽，妳講咩呀？阿爸呢？妳叫阿爸嚟聽。」
媽像聽不到王匡正的話，續說：「阿爸話，你要同阿玉好好地傾吓……」
「媽……」王匡正已有點耐不住，說：「阿爸呢？阿玉走咗好耐啦，點傾呀！不如妳畀阿爸同我講啦。」
「阿玉就返嚟 ……」電話斷了線。
「Jack，無咩事嘛？」白衣警官走到王匡正身邊。
把手機放回袋中，王匡正回頭說：「劉Sir，唔好意思，係我媽咪 ……」
「哦？」這個劉Sir頭輕搖，示意旁邊那女警先走，便說：「佢老人家幾好嘛？」
王匡正一臉苦笑：「OK，就係間唔中做埋啲傻嘢，講嘢又唔清唔楚。」
「老人家嘛 ……」劉Sir 笑道：「哎，佢地仲喺中山住？」
王匡正點點頭，和劉Sir跟人群往會議廳隔鄰的餐廳走去。
來到餐廳入口，王匡正正想步入，劉Sir 卻把他拉住，還指向不遠處的一張高桌。王匡正跟劉Sir來到高桌旁，見他拿出手機撥了幾下，然後把手機推向自己。
「SJ決定正式起訴伍Sir team 人……」劉Sir 用手指輕敲桌面：「伍Sir 都有份。」(註：SJ – Secretary of Justice, 律政司司長)
王匡正看著電話屏幕上的公文，心中納悶。半年前發生的事再現腦海，隨之而來困擾著他的種種調查與聆訊程序，像噩夢般揮之不去，使他十分沮喪。
像看穿王匡正的心事，劉Sir續說：「阿Jack，不過你放心，你個report係分開寫嘅，我同老頂都睇過，好清楚好乾淨，根本無case，起訴書更無提過你件事，You should be safe ……」
王匡正點點頭，苦笑不語。
「不過 ……」劉Sir 卻還有話說：「你都要小心，我亦收到風，條記者佬真係想拖埋你、同你老豆落水，畢竟世伯嘅身份特殊，加上你係佢個仔，砌你哋兩個比伍Sir 成team 人仲出位。」
王匡正抬頭看著劉Sir，問：「咁…… 傷人個條細路呢？」
「哈，條靚仔單case 表面簡單 ……」劉Sir 答道：「其實幾敏感，第一：佢老豆請咗個出名嘅古惑大狀幫條靚仔辯護；第二：傳媒將單case寫成大陸悍婦強告香港民主小鮮肉；一唔小心，分分鐘仲大鑊過伍Sir單嘢，你同世伯都要有心理準備。」
一臉無奈，王匡正說：「我明，我最怕就係老豆啲臭脾氣。」
這時電話在王匡正袋內震動，王匡正看見來電顯示，不禁眉頭一皺。
「家姐？」
劉Sir 看著王匡正聽電話的神情，見他雙眼越睜越大，下巴往下跌，卻吐不出半哼。
一群記者跟隨那女警向這邊走來，劉Sir 舉起手掌輕揚，女警會意便和記者站在遠處等候。
「劉Sir …… 」王匡正邊收起電話邊說：「我阿爸出咗事！入咗醫院！」
「知唔知咩嘢事？」
「未知，係我家姐打嚟，佢都唔清楚，好似話係意外，而家搶救緊，佢正趕緊去中山，我想……」
「去！」未等王匡正說完，劉Sir 即道：「馬上去！用住我哋部車先，Alice 會再安排，保持聯絡，OK？」
「Thank you， Sir！」王匡正急急離去。
劉Sir 走到記者群前面，先在那女警耳邊低聲說：「Jack 爸爸入咗醫院，未知情況，妳幫我follow 住，update 我。」
然後劉Sir堆出笑容，走近記者們一步。
「我好高興能夠代表香港警隊，嚟到廣州參加今次粵、港、澳大灣區防治跨境罪案交流會……」
